Министерот за надворешни работи на Република Македонија Никола Попоски денеска и утре ќе престојува во работна посета на Кралството Данска.
Како што соопшти денеска МНР, во рамки на посетата министерот Попоски ќе оствари средба со неговиот дански колега Вили Совндал, со кој ќе разменат мислења за политичките и економските односи меѓу двете земји, процесот на интеграција на Република Македонија во ЕУ и НАТО, како и за регионални и мултилатерални прашања.
Министерот Попоски, треба да се сретне и со министерот за европски прашања на Данска Николаи Вамен, со кого се очекува да разговара за напредокот на Република Македонија во спроведувањето на реформите, како и за очекувањата од Советот на ЕУ во јуни за донесување на одлука за започнување на пристапните преговори на Република Македонија со Европската Унија.
За време на посетата на Копенхаген, министерот Попоски, ќе учествува на Конференцијата под мотото: “20 години што ја променија Европа: Копенхашките критериуми и проширувањето на Европската унија“, во организација на Данскиот Институт за меѓународни студии и Министерството за надворешни работи на Данска, при што ќе има свое обраќање на панел-дискусијата на тема „Како проширувањето на ЕУ ја обликувало и продолжува да ја обликува Европа“.
Воедно за време на посетата на Кралството Данска, министерот Попоски ќе се сретне и со претставници на Македонско-данската бизнис мрежа.