Министерот за надворешни работи Никола Попоски, кој учествува на 68. Генерално собрание на ОН во Њујор, доцна вечер по македонско време има работна средба со еврокомесарот за проширување Штефан Филе, соопшти МНР.
Филе, како што потврди неговиот портпарол Петар Стано за дописникот на МИА од Брисел, ќе има и работен ручек со шефовите на дипломатиите на земјите од Западен Балкан.
Се очекува да стане збор за пристапниот процес на земјите од регионот кон Унијата, во пресрет на претстојниот прогрес-извештај што Европската комисија на 16-ти октомври ќе го издаде за Македонија и останатите кандидати и потенцијални кандидати за членство.
Еврокомесарот за проширување, претходно во Њујорк се сретна и со Метју Нимиц, медијаторот на ОН во разговорите меѓу Македонија и Грција за решавање на наметнатиот спор за името.