Министерот за надворешни работи Никола Попоски и генералниот директор за Европска соработка во Министерството за надворешни работи на Кралството Холандија, Роберт де Хрот на денешната средба во Скопје изразија заемно задоволство од позитивниот развој на односите и соработката меѓу двете земји, кои оваа година одбележуваат 20 години од воспоставувањето дипломатски односи.
Како што соопшти МНР, министерот Попоски, изрази високо уважување за континуираната принципиелна поддршка на Холандија за почеток на пристапни преговори на Македонија со ЕУ, како и за конкретната холандска помош и експертиза на македонските институции за хармонизација со европското право и стандарди.
– Фокусот на македонската Влада е насочен на максимизирање на резултатите од спроведувањето на активностите поврзани со Пристапниот дијалог на високо ниво и претстојниот пролетен извештај на Европската комисија за напредокот на Македонија. Наша примарна цел е почеток на пристапните преговори со Унијата без натамошно одлагање, за што сме целосно подготвени, и според принципот „стриктно, но фер“ очекуваме праведна одлука од ЕУ во јуни оваа година, посочи тој.
Генералниот директор Де Хрот ја повтори определбата на Холандија за продолжување на принципиелната и сестрана поддршка на Република Македонија во процесот на европска интеграција, вклучително и за што поскоро започнување на пристапните преговори со ЕУ.
Холандската позиција ќе биде формално потврдена по објавувањето на пролетниот Извештај на Комисијата и нејзините заклучоци и препораки за Македонија на 16 април оваа година, стои во соопштението од МНР.