Министерот за надворешни работи Никола Попоски денеска му возврати на неговиот бугарски колега Николај Младенов, дека само зголемена комуникација на министерско или друго политичко ниво може да го зголеми нивото на доверба меѓу Македонија и Бугарија.
„Кога говориме за добрососедство првата работа на која помислуваме е искреноста, отвореноста и отворената комуникација. Размените на посетите меѓу министри за надворешни работи или политички претставници од соседни земји е нешто на што мораме да работиме и што би требало да ги одразува работите кои се на одлично ниво меѓу граѓаните и бизнисите на двете земји. Конкретно, тоа би требало да се однесува и на Република Македонија и Република Бугарија“, рече Попоски по изјавата на бугарскиот министер за надворешни работи Николај Младенов дека нема потреба од разговори, туку од дела.
Во врска со предлогот на Младенов за промена на учебниците по историја во Македонија, Попоски повтори дека историјата треба да им се остави на историчарите.
„Сметам дека постигнавме определена согласност околу тезата дека историјата треба да биде оставена на историчарите. Мислам дека доколку се придржуваме до овој принцип можеме да обезбедиме најдобро ниво на соработка“, додаде министерот.