На покана на претседателот на Атлантскиот Совет на САД, Фредерик Кемпи, министерот за надворешни работи Никола Попоски денеска и утре ќе учествува на конференцијата „Кон цела и слободна Европа“, во Вашингтон.
На конференцијата, на која, како што соопшти Министерството за надворешни избори, се очекува учество на голем број лидери и експерти од светот на надворешната политика и безбедноста, ќе се обележат 25 – годишнината од паѓањето на Берлинскиот ѕид и 10-годишнината од историското проширување на ЕУ и НАТО, а воедно ќе се разгледаат и перспективите на евроатлантските интеграции.
Министерот Попоски ќе учествува на панелот „Консолидирање на југот на Европа”, на кој ќе ги презентира видувањата на Република Македонија околу иднината на процесот на проширување на ЕУ и НАТО во контекст на забрзано остварување на значајните стратешки надворешно – политички цели.
На маргините на Конференцијата, министерот Попоски ќе оствари повеќе средби со министри за надворешни работи и високи политички претставници од САД, ЕУ и регионот на Југоисточна Европа.