Македонија може да му понуди многу на рускиот бизнис, изјави денеска во Трговско-индустриската комора на Русија македонскиот министер за надворешни работи Никола Попоски.
Попоски, како што прeнесува Итар-Тасс, истакна дека Македонија е политички и економски стабилна држава и оти нејзината Влада гарантира заштита на странските инвестиции. Тој додаде и дека Македонија има најевтина потрошувачка кошница во цела Европа.
Потпретседателот на Трговско-индустриската комора Георгиј Петров констатира дека Македонија и Русија водaт редовен политички дијалог и посочи оти во изминатиот едногодишен период во Москва престојувале македонскиот премиер, вицепремиерот и министерот за земјоделство.
Тој подвлече дека обемот на трговска размена меѓу двете земји не ги одразува можностите. Според него, во првите девет месеци од минатата година стоковната размена е намалена за 40 проценти и ги повика руските и македонските бизнисмени да ја унапредат соработката не само во областа на енергетиката, туку и во други области.
– Убеден сум дека производителите од Македонија ќе најдат свои купувачи во Русија, рече Петров.
Попоски, кој престојува во официјална посета на Русија, на денешната средба потсети оти вчера е потпишан Договор за отворање културни центри на двете земји во Скопје и во Москва. Тој, како што наведува Итара-Тасс, ветил дека половина година по откривањето на Културниот центар на Русија во Скопје ќе го научи рускиот јазик.