Црна Гора и Македонија имаат традиционално одлични политички односи и идентични приоритети, но и многу поголем потенцијал за економска соработка, оценија во Скопје министерот за надворешни работи и вицепремиер на Црна Гора Игор Лукшиќ, шефот на дипломатијата Никола Попоски на заедничката прес-конференција.
– Динамично работиме на истите реформи за да напредуваме кон ЕУ интеграциите и побрзо пристапување во НАТО сојузот. Досегашното искуство на меѓусебна помош и поддршка во тој процес е добродојдено и тоа треба да продолжи, рече Лукшиќ.
Тој упати благодарносст кон Македонија за интензитетот на работата кога се во прашање регионалните иницијативи и како актуелен претседавач со Процесот за соработка во ЈИЕ со што, вели, придонесува за регионалната соработка и стабилноста на регионот.
Попоски како домаќин посочи оти со Лукшиќ имале дискусии отворени какви што се водат меѓу пријатели со особено внимание во делот на економската, регионалната соработка и политичките односи.
– Се согласивме дека имаме многу поголем потенцијал за економска соработка. Се обврзавме во наредниот период да организираме Мешовитата комисија за економска соработка и да се промовираме пред заеднички инвеститори и настап на трети пазари, рече Попоски.
Во делот на политичките односи констатирале одлична политичка комуникација и оти двете релативно мали и исклучително отворени балкански земји заедничките интереси и аспирации им се добар адут за зголемена комуникација на политичко ниво.
– Поставуваме добри стандарди за билатералните односи кои можеме да ги развиваме во регионот, а предизвиците со кои се сооочуваме се слични и имаме заеднички интерес да соработуваме во ЕУ и НАТО аспирации, истакна шефот на македонската дипломатија.
На новинарско прашање Лукшиќ рече дека се надева оти Македонија заедно со Црна Гора во ист ден ќе пристапат во членство во ЕУ.
– Лично би сакал Црна Гора и Македонија ист ден да влезат во ЕУ и НАТО. Со Македонија делиме заеднички предизвици, особено сето она што се случуваше на полето на европските и евроатлантските интеграции во последните 10 години. Црна Гора е благодарна на поддршката која Македонија и ја даваше и наша обврска е и ние исто така да постапиме кон Македонија. Наша порака е дека Западен Балкан мора да има своја перспектива во интеграциите. Околност е тоа што Црна Гора е единствена земја во моментот која го води пристапниот дијалог, со ЕУ од овој регион, но не сакаме тоа да биде така и наредните две години. Верувам и сите извештаи покажуваат дека Македонија е подготвена за отпочнување на процесот со Брисел. Сигурен сум дека времето од неколку месеци може лесно да се надокнади и Македонија да го фати чекорот во овие процеси, но тоа не смее да трае подолго, рече Лукшиќ.
Според Попоски, постои интерес особено за размена на дипломати и искуства во делот на економската дипломатија и праксата во поглед на реформите за членство во ЕУ.
– Од нас зависи каква визија имаме за соработката и за перспективноста на регионот и тука делиме иста визија, порача министерот за надворешни работи Попоски.
Црногорскиот министер за време на престојот во Македонија ќе биде примен и од претседателот Ѓорге Иванов, а ќе оствари средба и со премиерот Никола Груевски.