Европската комисија (ЕК) очекува политичка зрелост од сите чинители, што значи и препознавање на институциите и тоа дека политичкиот дијалог мора да се води во Парламентот, изјави во понеделникот министерот за надворешни работи Никола Попоски, коментирајќи ја минатонеделната посета на еврокомесарот за соседна политика и пристапни преговори Јоханес Хан на земјава.
„Мора да постои свест дека сите политички чинители имаат одговорност за дијалог во Собранието и тука нема никаква алтернатива. Еврокомесарот Хан не дојде со свој план или свое волшебно решение туку дојде со јасна порака дека сите во Македонија имаме одговорност за тоа процесите да се одвиват во сите соодветни демократски институции“, изјави шефот на македонската дипломатија.