Стотина симпатизери на СДСМ, денеска повторно се собраа пред седиштето на партијата, за да побараат да им се обрати лидерот Бранко Црвенковски, но и да не замине од кормилото на партијата, со тоа што повторно би бил кандидат за претседател на најголемата опозициска партија на конгресот закажан за 2. јуни во Скопје.
Повторно денеска со нив разговараше Генералниот секретар на партијата, Андреј Петров, кој се обиде да им објасни дека постапката за избор на нов опозициски лидер е веќе започната, а одлуката на Црвенковски да не се кандидидра е лична.
„Црвенковски не е ниту заморен од СДСМ, ниту пак е болен. Тој оставката ја поднесува бидејќи не успеал да ги убеди членовите во оправданоста на своите ставови“, рече Петров.
Петров во изјавата за новинарите, посочи дека тој како Генерален секретар и Црвенковски како лидер, нема да застанат зад ниту еден од кандидатите за претседател. На сите кандидати ќе им биде дадена еднаква можност за претставување, но рече Петров, увидот во делегатскиот список не може да биде доставен бидејќи едно е 700-тини делегати, а друго е избирачки список.
„Се надевам дека во демократски амбиент ќе биде избран новиот лидер. Ќе има големи разлики со она што му се случуваше на ВМРО-ДПМНЕ при партиските кавги во хотелот „Панорама“.
– Ова ќе биде нов почеток на СДСМ. Нема да дозволиме кампања на ниско ниво, ниту етикетирање на кандидатите. Политички противник на СДСМ е ВМРО-ДПМНЕ“, додаде Петров.
На симпатизерите кои рекоа дека нема да се разотидат додека Црвенкосвки не им се обрати или ја повлече одлуката, им порача дека исклучително ги почитува но, на нивните барања не може да им излезе во пресрет, бидејќи одлуката што ја донел Црвенковски е негова лична.