Гостиварската полиција осомничи и кривично пријави две лица, кои се осомничени дека извршиле 14 тешки кражби во куќи во Гостивар и околните населби во февруари и март годинава.
Полицијата го приведе едниот осомничен, додека по другиот се трага.
Според СВР Тетово, осомничени како извршители на кражбите се А.Х.(22) од Гостивар и А.О.(20) од Кавадарци, со времено престојувалиште во Гостивар. Двајцата пријавени изминитите два месеци, најчесто преку прозорците, кои насилно ги отворале, провалувале во куќите и одземале најразлични предмети, претежно технички производи (телевизори, рисивери и друго), покуќнина (теписи, завеси), облека и алатки. Украдените работи, подоцна ги препродавале на други лица. При извршениот претрес кај едниот, пронајдени се и дел од украдените предмети.
Дваесетгодишниот А.О. е приведен и вчера е изведен пред судија во претходна постапка на Основниот суд Гостивар и определен му е осумдневен притвор, додека А.Х. засега е недостапен и се бара.
