По акциската контрола, изминатиот викенд, кога во угостителски објект-дискотека во Гостивар, биле затекнати пет малолетници кои конзумирале алкохолни пијалаци, од СВР Тетово најавуваат засилени контроли. Целта е да се спречи, малолетници да конзумираат алкохол и санкционираат сите оние кои им го овозможуваат тоа.
Марјан Јосифоски, портпаролот на СВР Тетово потврди дека деновиве е засилено присуството на полициските службеници на места кои се најчести собиралишта на младите.
– Евидентирана е појава кога малолетници, најчесто за викендите, конзумираат алкохолни пијалаци во угостителските објекти во кои престојуваат, по што неретко учествуваат и во разно-разни нарушувања на јавниот ред и мир во или надвор од објектите. Оддавањето на пијанство и нарушување на јавниот ред и мир е законски прекршок, за кој е предвидена глоба од 100 до 400 евра, изјави Јосифоски.
Тој ги потсети сопствениците на угостителски и трговски објекти да не продаваат и служат алкохол на малолетници, бидејќи ќе се соочат пријави и парични или казна затвор од три месеци до три години. Доколку малолетникот е под 14 години, тогаш санкциите се уште поригорозни и затворската казна се движи од една до пет години.