Единаесетмина љубители на комарот од Скопје не го дочекале крајот на партија во која учествувале во стан кај Католичката црква, откако ги „намирисала“ полицијата, која освен за незаконското коцкање, ги растура и собирите кои се прават наспроти важечките прописи за заштита од коронавирусот.
„СВР Скопје-Единица за економски и компјутерски криминал поднесе кривична пријава против И.С.(39) од Скопје и против М.Н.(67) од Скопје за сторено кривично дело „комар” од чл.398 ст.1 од КЗ. Првопријавениот на 28.04.2021 година, неовластено организирал играње комар во просторија- стан лоциран на ул.Костурски Херои во општина Центар, кој му бил ставен на располагање од страна на второпријавената М.Н., при што, при превземено истражно дејствие претрес на дом од страна на полициски службеници во Единицата за економски криминал“, велат од МВР.
Затекнати се 11 лица како играат комар, кои што воедно постапувале и спротивно на пропишаните мерки и протоколи за заштита од Ковид 19, каде што е изрично забрането групирање на повеќе од четири лица во затворен простор и објект, за што исто така следува соодветен поднесок, додаваат од полицијата.