Полицијата денеска до Основното јавно обвинителство Скопје го предаде 31-годишниот А.Љ. со пријава дека вчера сторил разбојништво во Македонска пошта на булеварот „Крсте Мисирков“.
Како што информира МВР, пријавениот, кривичното дело го извршил вчера на бул. “Крсте Мисирков“ околу 07,20 часот во експозитура на АД “Македонски Пошти“ на тој начин што вооружен со пиштол во раката и детска пластична маска „Спајдермен“ на лицето влегол во просторот за странки, насилно ја отворил незаклучената врата за влез во шалтерскиот простор, влегол зад работниот пулт, и со закана со пиштолот од вработените побарал да ја отворат касата по што едната од нив го земала клучот од касата и ја отклучила.
Од касата одзел околу 1.500 денари, а од работните бироа од фиоките пронашол и украл уште 44.534 денари, и со одземените пари, вкупно 46.034 денари го напуштил местото на настанот бегајќи во правец кон Хотел „Арка“. Покрај преноќувалиштето „Виена“ ја фрлил маската и дошол пред хотелот „Хамбург“ лоциран на бул.„Крсте Мисирков“ каде што бил вработен. Откако А.Љ. влегол во хотелот отишол во тоалет и во разводната кутијата од цевките за парно го скрил сивиот дуксер, а во машката гардероба од хотелот го скрил ранецот заедно со пиштолот и ракавицата и откако се преоблекол во одело го напуштил хотелот.
Од страна на полицијата извршен е претрес при што се пронајдени еден спортски ранец „ЈР“, црно-сина боја, еден пластичен пиштол црна боја, една маска „спајдермен“ со отвори за очите и пари.
Во Полициската станица во Гази Баба извршен е службен разговор со пријавениот во кој тој во целост појаснил кога, каде и како го извршил наведеното кривично дело.
Секторот за внатрешни работи – Скопје презема мерки и активности за расветлување и на други кривични дела извршени од страна на ова лице.