Група полицајци синоќа биле приведени во кратовското село Куклица, откако биле затекнати како прават забава со гласна музика и викање, дознава „А1он“. Полицајците ги пријавиле жители на селото на кои им пречела бучавата, и кои биле револтирани што постојано се повторува дека МВР нема кадар за да се спреведуваат мерките против коронавирусот, а од друга страна ги кршат мерките и прават журки.
Станува збор за седум припадници на МВР, кои наместо да ја спроведуваат, со нивното однесување ја прекршиле забраната за собирање и групирање.
Според извори на „А1он“, на забавата имало околу 15 лица. Полицајците и цивилните лица присутни на забавата давале отпор при обид за нивно приведување, по што, била ангажирана и Единицата за брзо распоредување. Тие со лисици биле однесени во надлежната полициска станица. За случајот е известено и Обвинителството, кое сега, ќе треба да постапи да бара казна за непочитувањето на мерките.
Припадниците на полицијата со нивното однесување го прекршиле членот 206 од Кривичниот законик и не постапиле согласно здравствените прописи во време на епидемија, дело за кое во изминатиот период биле ангажирани да санкционираат доколку било направено од граѓаните.