Секторот за внатрешна контрола и професионални стандарди при МВР до Основното Јавно обвинителство Скопје, достави посебен извештај за запознавање и понатамошно постапување, во врска со констатирано коруптивно однесување, „примање поткуп“ извршено од страна на полициските службеници В.Т.(51) и М.Б.(33) двајцата полицајци-позорникари во СВР Скопје.
Како што соопшти денеска МВР, на 28.07.2012 година, началник на единицата за јавен ред и мир при СВР – Скопје, околу 21:45 часот на Бул.„Никола Карев“ додека извршувал контрола на службите на терен од Одделение за општи патроли – Исток, управувајќи патничко возило марка – Шкода фабија (инаку службено возило), бил сопрен од страна на двајца полициски службеници. По ова едниот од нив му побарал лични исправи и му соопштил дека сторил прекршок „поминување на затворен сигнал – црвено светло“ и оти треба да плати глоба во износ од 300 евра, како и 30 евра за неносење возачка дозвола, а за да ја одбегне казната треба да почасти. Откако началникот се легитимирал, другиот полициски службеник во паника свиткал кутијата со цигари и ја фрлил покрај себе, по што началникот, во кутијата забележал дека покрај цигари има и банкнота од 500 денари.
Против двајцата е поднесена кривична пријава за примање поткуп. Од Секторот за внатрешна контрола и професионални стандарди пак до нивните претпоставени е поведена дисциплинска постапка за отказ, а до реализација на истата двајцата полицајци се суспендирани.