Вицепремиерот за европски прашања Бујар Османи, во рамките на посета на Република Хрватска оствари средба со хрватската вицепремиерка и министерка за надворешни работи и европски прашања Марија Пејчиновиќ-Буриќ, на која било разговарано за европските перспективи на Северна Македонија.
Османи, како што информираат од неговиот кабинет, на средбата истакнал дека постои долга традиција на добри односи и пријателство меѓу двете земји, кое било потврдено и со брзата ратификација на протоколот за членство НАТО, како и преку континуираната поддршка за европските интеграции на нашата земја.
– Се наоѓаме буквално на еден ден од објавата на Извештајот на Европската Комисија, во чија содржина, веќе извесно е, дека ќе се рефлектира напредокот на Република Северна Македонија и во затворањето на политичките прашања, но и напредок во имплементација на реформската агенда, изјавил Османи.
На средбата, Османи посочил и на очекувањата во земјава за испорака на преземените обврски од страна и на Европската Унија, преку конфирмација на одлуката од минатата година, за почеток на преговорите со Северна Македонија оваа година.
– Свесни сме за потребата од остварување консензус за оваа одлука во рамките на ЕУ, како и за предизвиците со кои се соочува Унијата, а кои претставуваат предизвик и за земјите – членки, и во оваа насока ја очекуваме поддршката од нашите најблиски пријатели во остварување на нашите европски перспективи, меѓу кои секако ја сметаме и Хрватска, истакнал Османи, се вели во соопштението од СЕП.
Во рамки на посетата на Хрватска Османи треба да оствари средба и со Претседателот на Комисијата за европски прашања во хрватското собрание Домагој Иван Милошевиќ, на кои покрај европските интеграции, како што информираат од СЕП, ќе се разговара и за соработката меѓу парламентите на двете земји, како и за улогата на националните законодавни тела во европските процеси.