Градоначалникот на општина Куманово Зоран Дамјановски денеска изврши увид во реализацијата на проектот за изградба на конструкцијата на надвозникот на улицата „100“ во населбата Карпош.
Проектот е дел од развојната програма на општина Куманово и е во вредност од 9,5 милиони денари. Се реализира на барање на родителите на децата кои следат настава во основното училиште „Магдалена Антова“ бидејќи досега на мостот немаше тротоари.
– Тендерската постапка е завршена на почетокот на годинава и е дел од развојната програма на општина Куманово. Пред неколку дена почнаа подготвителните работи, а сега се отпочнува со бетонирање, поставување темели за проширување на мостот, нова конструкција на мостот, проширување на тротарите и изградба на патна инфраструктура во должина од 250 метри, изјави Дамјановски.
Тој најави дека ќе се прошири и коритото на суводолицата под надвозникот со што, како што рече, ќе се обезбеди поголема заштита од излевање при поројни дождови, а ќе се постават и решетки за собирање на атмосферската вода по должина на улицата, која е главна сообраќајница во оваа кумановска населба.
Дамјановски информира дека ќе се реконструира и улицата во должина од 250 метри. Проектот се очекува да заврши за два ипол месеци, пред почетокот на учебната година.