Во Министерството за животна средина и просторно планирање денеска се одржа прв состанок на Националниот комитет на УНЕСКО за реализирање на програмата „Човек и биосфера” (МАБ Комитет). Тоа е предуслов пред УНЕСКО да почне процес на номинација на локалитети од Република Македонија или прекугранични подрачја за биосферни резервати.
– Програмата „Човек и биосфера“ предлага интердисциплинарно истражување и иницијатива за градење капацитети со цел да се подобри односот на луѓето со нивната околина на глобално ниво. Концептот на биосферни резервати е развиен во рамки на програмата и претставува механизам за воспоставување баланс помеѓу заштитата на природата и развојот на локалните заедници, како и алатка за унапредување на прекуграничната соработка, соопшти Министерството за животна средина и просторно планирање.
Министерството наведува дека меѓу неговите приоритетни и стратешки цели е заштита и зачувување на природното наследство и дека прави значителни напори за поефикасна имплементација на меѓународните договори од областа на заштитата на природата што Република Македонија ги има ратификувано, меѓу кои и спроведување на Конвенцијата за заштита на светското културно и природно наследство.