Во Неготино синоќа се одржа „Неготинска фолклорна вечер“ во организација на националната установа за култура Ацо Ѓорчев од овој град, а со поддршка на Министерството за култура на Република Македонија.
– Годинава за прв пат се одржа една ваква манифестација за која се надеваме дека ќе стане традиционална. Целта е во екот на гроздоберот во најголемиот лозаровинарски регион во државата во текот на вечерта неготинци, па и нивните гости да ја почувствуваат магијата на фолклорот, рече директорката на културниот центар Мирјана Јованова.
На градскиот плоштад во Неготино свој настап имаа фолклористите од културно уметничкото друштво „Ацо Ѓорчев“ кое работи во склоп на центарот за култура, пејачката група „Лира“, „Харизма бенд“, „Чардак бенд“ и „Антигона бенд“, како и естрадниот уметник Горан Јованов. Специјален гостин беше вокалната група од збратимениот град Попово.