Нови простории за Ловечкото друштво „Вардар” почнаа да се градат денеска во Неготино. Неготинскиот градоначалник Ванчо Апостолов појасни дека со продажбата на салата на ДТВ „Партизан“ и нејзината пренамена во модерен станбено-деловен објект се опфатени и поранешните простории на ловното друштво, а со самото тоа, рече тој, се наметнала неопходноста ловџиите да добијат нови простории.
Во присуство на ловџии од целата општина, Апостолов информираше дека локалната самоуправа има континуирана соработка со сите, па и со ловното друштво.
Во име на неготинските ловци, задоволство од изградбата на нови простории изрази претедателот на ловното друштво Димче Михов.
– Овој објект е од големо значење за нашето друштво кое брои окоу 300 членови. Покрај со ловство, се занимаваме и со прехранување на дивеч. Имаме добра соработка со општина Неготино и неготинскиот градоначалник, кој има разбирање за сите наши барања. Се надеваме на соработка и во иднина, рече Михов.
Проектот чини околу два милиона денара, а објектот треба да биде изграден најдоцна за два месеца.