Пратениците во македонскиот парламент после повеќе од три часа го усвоија дневниот ред за работа за денеска, при што законот за јазиците е ставен како осма точка на истиот. Сепак и натаму е низвесно дали ќе се дискутира за оваа точка, откако пратениците од опозициската ВМРО-ДПМНЕ доставија 35.569 амандмани, а според информации од собраниските служби се уште не се преведени сите амандмани.
Претходно, пратеникот од редовите на ВМРО-ДПМНЕ, Илија Димовски, на прес-конференција во Собранието изјави дека за законот за јазиците не биле спроведени консултации со стручната јавност, ниту со здруженијата на помалите етнички заедници. Тој рече дека на законот му е ставено европско знаменце со цел да се ограничи дискусијата.
Зијадин Села од „Алијансата за Албанците“, пак, денеска изјави дека нема смисла однесувањето на пратениците на ВМРО-ДПМНЕ, кои, како што рече, дошле во Собранието за да се спротивстават на една третина од интересите на граѓаните. „Блокирањето на законот за јазиците е за казнување од целата јавност и ги повикувам да престанат со политики на продлабочување на поделбите“, изјави лидерот на „Алијансата за Албанците“.
Г.Н.Р.
