Поради неповолните временски услови кои вчеравечер го погодија главниот град, јавните претпријатија на Град Скопје и Противпожарната бригада на Град Скопје извршија поголем број интервенции на терен за елиминирање на последиците од силните ветрови.
Екипите на јавното претпријатие „Паркови и зеленило” интервенираа на повеќе локации во градот и отстрануваа скршени гранки и дрвја. Во текот на ноќта екипите интервенираа на повеќе локации на булеварот „Илинден“, на улиците „Орце Николов“, „Киро Крстевски – Платник“, „Веселин Маслеша“ бр.1, „Сава Ковачевиќ“ бр.26, на булеварите „Јане Сандански“ и „Кузман Јосифовски – Питу“, на улицата „Божидар Аџија“, како и на потегот меѓу паркот „Жена борец” и Ургентниот центар.
Во овие интервенции се приклучија и екипите на ЈП „Улици и патишта” кои интервенираа на повеќе локации, а Противпожарната бригада на Град Скопје имаше вкупно 28 интервенции.
– Поради непристапноста на теренот, намалениот видик и опасноста од струен удар, екипите на јавните претпријатија на Град Скопје не беа во можност да интервенираат во текот на ноќта и на неколку локации интервенираа во раните утрински часови, информира Град Скопје.
