Градоначалникот Меџити и иницијативниот одбор успеаја на цивилизиран и општествено корисен начин да постигнат компромис за пример во демократска Македонија и овој преседан треба да биде следен и од останатите општини.
Компромисот што го постигнаа локалната власт и граѓаните во Чаир е за секаква пофалба. Откако граѓаните гласно повикаа општината да помогне во зачувувањето на зеленилото во општината, 10 од 12 паркови се спасени благодарение на цивилизираниот и демократски однос на општината кон своите граѓани.
Откажувањето од потенцијалниот приход од 500.000 евра од страна на општината е секако значаен фактор во постигнатиот договор, но уште повпечатливо е приоретизирањето на здравјето и животната средина на граѓаните пред бизнис интересите и општинскиот буџет.
Дополнително, подадената рака на Општина Чаир кон луѓето кои живеат кај двата останати паркови и нивното обештетување со нови фасади, лифтови и сл., е исто така за поздрав и покажува како една институција треба да се однесува во спорни ситуации кога неизбежните исходи можат да бидат ублажени со креативни возвратени услуги.
Плоштад Слобода ги повикува и останатите скопски градоначалници, а посебно Жерновски (Бристол) и Јакимовски (Мексичка), на сличен начин да обезбедат демократски и цивилизирани дијалози со граѓаните за спас на зеленилото и парковите во Скопје.