Тројца загинати полицајци, жена и дете се последните информации од денешната полициска акција во Куманово, соопштил на прес-конференција, кумановскиот градоначалник Зоран Дамјановски – Циц, јави „24 Вести“.
Како што рече Дамјановски, овие информации се неофицијални и дека истите ги добил „од новинари и мештани“.
Состојбата во Куманово и натаму е драматична, а полициската акција е се уште во тек.
Универзитетоскиот професор, Владимир Пивоваров, кој живее во Куманово вели дека состојбата во Куманово е како да се води војна.
– Утрово околу 5 часот беше страшно. Се слушаа рафали и детонации, а потоа ситуацијата се смири. По извесно време престрелките се интензивираа. Целиот дел над пазарчето што води кон „Дива Населба“ е затворен од полицијата. Таму имаме стари лица, кои не можеме да ги извлечеме – вели Пивоваров.
Пукотниците, додава тој, повторно интензивирале околу пладне.
– Прво се слушаа истрели на муниција со калибар 7,62 и 7,65 милиметри, но почнаа престрелки со оружје и муниција со поголем калибар. Хеликоптери, од кои дел претпоставувам се и на армијата и беспилотни летала, постојано го надлетуваат градот – вели Пивоваров.
Престрелките почнале на една локација во населбата, но по некое време се прошириле и на други делови од населбата, и едно време пукотници имало и во близина пазарчето, но полицијата успеала да ги потисне.
Пивоваров вели дека дополнителна паника меѓу граѓаните во Куманово создало и тоа што „Тинекс“ ги затворил сите продавници во градот.
– Инаку граѓаните на Куманово, обичните граѓани од сите етнички заедници, се огорчени од денешните случувања. Се прашуваат едни со други, што се случува. Мислам дека сега се посплотени отколку било кога – вели за „Мета„ професорот Пивоваров.
Извор: Мета