Однесувањето на ВМРО-ДПМНЕ, по судската одлука за домашен притвор за Талески, осомничен за злоупотреба на 360.000 евра, го покажува стравот и паниката што владеат во нивните редови од соочување со одговорноста, изјави денеска на прес конференција, координаторот на советничката група во Општина Битола од СДСМ, Наташа Петровска.
– ВМРО-ДПМНЕ се обидува преку притисок врз судството да го одбрани криминалот во сопствените редови. Народот преку „Вистината за Македонија“ слушна какво мислење имаат сопартијците за Владимир Талески, актуелниот пратеник Зоран Илиоски, како и поранешниот министер Зоран Ставрески. За апсурдот да биде уште поголем прв кој се стави во негова одбрана беше токму Зоран Илиоски, човекот кој велеше дека Талески не направил апсолутно ништо во неговиот мандат. Дали е тоа така токму поради фактот што Зоран Илиоски по предлог на Владимир Талески 2 пати беше дирекор на ЈП „Водовод“? Дали е така можеби поради фактот што додека беше директор во ова претпријатие го вработи својот брат? – рече таа.
Петровска нагласи дека ВМРО-ДПМНЕ се уште не може да се помири со тоа дека правдата ќе го стигне секој кој се огрешил пред законот, секој кој работел против интересот на граѓаните.
– Но правда ќе има. Тоа важи и за Владимир Талески кој итно треба да си поднесе оставка за да може општина Битола да работи во интерес на граѓаните. Граѓаните очекуваат законите и правдата да важат за сите подеднакво. Оттука, надлежните органи и битолската полиција треба да дадат одговор на прашањето дали Талески конечно го доби решението за куќен притвор – рече советничката Петровска.