Еколошкото хуманитарно здружение „Извор“ остро реагира и изразува длабока огорченост за последните состојби околу и во Вардар. Од таму велат дека како резултат на голем број градежни работи и лошо планирани проекти во и околу реката се случи излевање на Вардар од коритото и создавање ризик по животот на граѓаните.
„Сите овие бетонски конструкции кои се направени во коритото на оваа река, како што се фонтаните, бродовите, панорамското тркало и други, служеле само за политички и финансиски придобивки кај поединци на високи позиции во минатата власт, а во голема мера ги загрозуваат животите на жителите на Скопје, но и животот на подводниот свет во реката Вардар“, велат од здружението.
Од таму наведуваат дека побарале од Министерството за животна средина и просторно планирање, заедно со Градот Скопје, како и други релевантни институции во земјата, да ги преземат сите мерки како политички, така и практични, за отстранување на бетонските бариери кои предизвикуваат излевање на Вардар.