Изутрината во шест часот е отстранет одронот од карпи и земја од регионалниот пат Ресен – Стење, кај местото викано Сирхан, на еден километар пред Отешево, поради кој синоќа од 22 часот беше блокиран тој патен правец, соопшти Дирекцијата за заштита и спасување.
Во активностите за расчистување на патот беа ангажирани подрачното одделение на Дирекцијата за заштита и спасување од Ресен како и од ЈП „Македонија Пат“ – Битола.
– Со употреба на соодветна градежна механизација и со вонредни напори на лицата кои беа ангажирани под доста студено време во период од 00:00 до 06:00 утрово патниот правец целосно беше расчистен од одронетиот материјал и патот беше ставен во функција. ПС Ресен за цело време на акцијата го обезбедуваше теренот за полесно и побрзо расчистување на патниот правец, се вели во соопштението.
Од Дирекцијата за заштита и спасување воедно истакнуват дека проодноста на тој патен правец е од големо значење бидејки во Отешево се наоѓа Заводот за рехабилитација на неспецифични распираторни заболувања.