Осумнаесет албански државјани, кои непријавено претсојувале во Тетовско биле откриени при денешната акциска контрола на полицијата на неколку места во Тетово, Порој и Џепчиште, информираше портпаролот на СВР Тетово Марјан Јосифовски.
Според неговите податоци акцијата била спроведена денеска наутро околу 6 часот и при тоа еден од нив немал никакви документи, тројца поседувале патни исправи, а останатите само лични карти.
Јосифовски додаде дека набрзо по приведувањето во Полициската станица Тетово албанските државјани, кои се на различна возраст од 18 до 58 години, претежно од градовите Либражд и Дибр, предадени се во Отсекот за прекуграничен криминал, миграции, странци и реадмисија за натамошна постапка.