Двајца царински службеници добија отказ поради примање поткуп при вршење на своите службени задачи.
Како што соопшти Царинската управа на Република Македонија, отказите се изречени откако царинските службеници, со судска одлука, правосилно се осудени за кривично дело „Примање поткуп“, каде едниот царински службеник правосилно е осуден на казна затвор во траење од 6 месеци, а другиот на казна затвор во траење од 1 година.
Во март 2009 година на граничниот премин Ќафасан, од лице со прикриен идентитет цариниците побарале и примиле пари за да не извршат службено дејство што морале да го извршат, односно да пресметаат и наплатат царински и други давачки или да ја одземат стоката која е од трговски карактер.
По откривањето на случајот, царинските службеници се веднаш суспендирани од работните места, врз основа на покренато обвинение од Основното јавно обвинителство Струга за сторено кривично дело, примање поткуп, а по правосилноста на судските пресуди, двајцата се отпуштени од службата, стои во соопштението.