На подрачјето на Скопје во изминатите 24 часа сообраќајната полиција извршила увид во осум сообраќајни несреќи, при што патник во автобус се здобил со телесни повреди. Во седум сообраќајки е предизвикана мала материјална штета и е пополнет Европски извештај.
Во текот на вчерашниот ден сообраќајната полиција открила и санкционирала 18 возачи кои не го почитувале ограничувањето на брзината на движење. Од нив, 10 возачи се движеле со брзина поголема од 90 километри на час во населено место, 24 возачи кои не го користеле безбедносниот појас или го користеле мобилниот телефон за време на управување на возилото, девет возачи кои не отстапиле првенство на минување на пешаците на обележан пешачки премин, пет возачи кои не ги почитувале светлосно сообраќајните знаци на крстосниците и 18 возачи кои ги управувале своите возила по истекот на важноста на сообраќајната дозвола или без возачка дозвола.
Со помош на специјалното возило „пајак“ се отстранети 48 возила кои го попречувале нормалното одвивање на сообраќајот.
Во рамки на кампањата за зголемување на безбедноста на сообраќајот на патиштата „Почитувај ги правилата, почитувај го живото“, што ја започна Владата на Република Македонија, Отсекот за превенција при Единицата за безбедност во патниот сообраќај при СВР Скопје денеска ќе реализира едукативни предавања во градинката „Весели цветови“ која се наоѓа на територијата на општина Кисела Вода.
Отсекот за превенција при Единицата за безбедност во патниот сообраќај во рамките на сообраќајно-воспитниот проект „Да ги заштитиме децата во сообраќајот“ ќе реализира едукативни работилници во основните училишта „Св. Кирил и Методиј“ и „Гоце Делчев“ кои се наоѓаат во општина Центар со учениците од второ и четврто одделение.
За денеска не се најавени вонредни настани со што се очекува сообраќајот да се одвива тековно и според постоечката сообраќајна регулатива.