Полициски службеници од Полициска станица Тетово извршиле контрола во угостителски објект на локалниот пат за село Сараќино, при што било констатирано дека објектот е отворен по дозволеното работно време и во него биле затекнати седум гости, тројца вработени и 20 женски лица, од кои 18 странски државјанки од Русија, Србија, Украина и Албанија, кои го злоупотребиле туристичкиот престој. Странските државјанки се приведени во полициска станица за понатамошна постапка.
Од МВР денеска соопштија дека се работи за угостителски објект, во сопственост на А.М.(38) од Тетово, а контролата е извршена по пријава дека работел спротивно на Одлуката донесена од Владата.
– Странските државјанки се приведени во полициска станица за понатамошна постапка, а сопственикот А.М. е лишен од слобода и против него ќе биде поднесен соодветен поднесок. При контролата е приведен и Б.Х.(25) од Скопје, кој издржува казна затвор во времетраење од 8 години и 6 месеци, а не се придржувал спрема решението за одмор во кругот на семејството издадено од затворот. Тој ќе биде спроведен во Казнено-поправна установа Затвор Идризово, се наведува во соопштението од МВР.