Темата за уставните измени треба што побрзо да биде отворена во Парламентот вели министерот за надворешни работи Бујар Османи. Тој на денешниот брифинг со новинарите апелираше политичките партии да постигнат консезус во врска со европските прашања и да биде постигнат договор околу тоа дека кој и да биде на власт нема да има разлики во однос на ова прашање.
-Погрешно е размислувањето дека ние преговараме со Европската Унија. Фиксни се регулативите и директивите. Вие мора да ги прифатите такви какви што се за да станете членка. Без разлика дали е СДСМ на власт или ДУИ или ВМРО, никој нема можност нешто да смени во делот на преговорите со Европската Унија. Единствено што може да смени е во динамиката на испорачување и во прифаќање, потенцираше Османи.
Османи смета дека оваа тема конечно треба да биде затворена затоа што вели граѓаните без разлика на тоа на која политичка провиниенција и припаѓаат сакаат влез во ЕУ.
-Ако нема разлика, зошто тогаш да не ја оставиме оваа тема на страна, во интерес на граѓаните кои сакаат ЕУ и од едната и од другата страна на политичката сцена. Имаме доволно други теми за расправање, рече Османи.
За провокациите кои доаѓаат од Бугарија Османи вели дека се од профили кои се деструктивни за нивните општества. Не рефлектираат позитивен имиџ за својата држава, па најдобро е да се игнорираат и да не им дава тежина на таквите луѓе.
„Има провокации од типот ‘член на историска Комисија рекол нешто за нашата држава’. Ние не можеме да ги спречиме луѓето да зборуваат и да провоцираат, но важно е дали ќе дозволиме тие да го водат орото“, рече Османи на денешниот брифинг.
Според него, фактот што во Бугарија нема политичка влада создава потешкотии, но оние кои провоцираат во однос на територијалните претензии, тоа го прават намерно за политички поени, со цел ние да реагираме и потоа тоа го користат во политичката агенда во Бугарија.
Османи додаде дека за сега преговорите течат во најдобар ред, а билатерланиот скрининг оди по план.