Заменик претседателот на Владата задолжен за европски прашања Бујар Османи денеска имаше средба со директорот на Фондацијата Фридрих Еберт Штифтунг во Македонија, Франк Хантке.
Средбата следува по неодамнешната посета на Османи на Берлин на покана на германскиот министер Михаел Рот, каде што оствари средба и со Александар Калвајт, раководител за меѓународна соработка при фондацијата Фридрих Еберт, соопшти СЕП.
Вицепремиерот Османи на средбата го информираше Хантке за реализацијата на Планот 3-6-9, во однос на спроведените реформи за унапредување на процесот на европска интеграција на земјата. Се осврна и на постигнатиот напредок во добрососедските односи кои се видливи со потпишаниот Договор за добрососедство со Бугарија, посетата на грчкиот министер за надворешни работи Никос Коѕиас на Македонија која е исто така сигнал за позитивниот развој на добрососедските односи со Грција, но и подобрувањето на меѓуетничките односи во земјава со усвојувањето на предлог- законот за употреба на јазиците, се вели во соопштението од СЕП.
Османи на средбата побара од Хантке поддршка од Фондацијата во спроведување на реформите на новата Влада кои се приоритетни во овој период, особено за поддршка на процесот на трансформација во областите на вклучување на граѓанското општество на повеќе нивоа и поддршка на граѓанскиот активизам, промовирање на социјалниот дијалог, европската интеграција и регионалната соработка со земјите од Западен Балкан, како и поддршка на дијалогот помеѓу политичките чинители за постигнување консензус по прашањата кои се од големо значење за Македонија. Притоа, Османи изрази задоволство од досегашнното функционирање на Фондацијата Фридрих Еберт, која постои во земјава од 1996 година и со тоа претставува стабилен и доверлив партнер за соработка, информира СЕП.
