Во кумановската библиотека „Тане Георгиевски“ денеска се одржа 15. општински натпревар „Млад библиотекар“.
На натпреварот, кој се одржа по повод Месецот на книгата, учествуваа ученици од сите 16 основни училишта од градот, кои имаа можност да го покажат своето знаење од областа на библиотекарството. Победникот ќе ја претставува општината на републичкиот натпревар кој ќе се одржи на 3 ноември во Струга.
– Во насока на популаризација на книгата, по повод Месецот на книгата кој се одбележува од 15 октомври до 15 ноември библиотеката организира и литературен и ликовен натпревар, кој ќе се одржи на 24 и 25 октомври. Имаме поднесено голем број на пријави околу 120 од основните и средните училишта, а на натпреварите ќе учествува и македонски писател за деца кој ќе им ја зададе темата на учениците, изјави директорот на библиотеката, Марјан Петковски.
Надлежните од библиотеката нагласија дека се задоволни од знаењето кое го покажуваат учениците. Тие се надеваат дека кумановци и оваа година, како и претходните ќе постигнат високи резултати и на државниот натпревар.