Општина Струга објави оглас за вклучување невработени лица во програмата за општокорисна работа во рамките на проектот „Подобрување на квалитетот во претшколските установи и основните училишта во општината“.
На огласот може да се пријават невработени лица евидентирани во Агенцијата за вработување повеќе од една година и да исполнуваат еден од условите: млади до 29 години, корисници на социјална помош или паричен надоместок за неврботеност, лица кои имале статус на деца без родители и родителска грижа, жени припаднички на помалите етнички заедници, родители на деца со пречки во развој, родители на три и повеќе деца.
Лицата, како што е наведено во огласот, ќе бидат ангажирани за период од девет месеци со скратено работно време, заради стекнување вештини и постепено вклучување на пазарот на труд. Во периодот на ангажманот, како што стои во огласот, нивниот статус нема да биде променет, односно ќе се водат како невработени, а за они што користат социјална помош ќе им бидат активни правата за користење.
За лицата што ќе бидат вклучени во програмата предвиден е паричен надомест од 9.000 денари месечно, со вклучен персонален данок и осигурување во случај на незгода.
Заинтересираните кандидати своите пријави може да ги достават во Центарот за социјални работи во Струга најдоцна до 14 август 2018 година.