Изминатите денови општина Ранковце беше зафатена од невреме проследено со обилни врнежи од дожд кое предизвика огромни штети.
„Интензивните дождови предизвикаа излевање на Крива Река и останатите помали притоки поради што дојде до оштетување и прекин на повеќе патни правци, а неколку мостови во селата Опила, Ветуница, Отошница и Ранковце се со поголеми оштетувања кои оневозможуваат сообраќај преку нив.
Зголемениот водостој нанесе големи штети на водоводната инфраструктура поради што голем број на домаќинства се без вода за пиење, а во некои населени места каде жителите се снабдуваат со вода од природни извори водата е заматена и не може да се користи за пиење.
Канализационата мрежа во Ранковце претрпе големи штети за кои ќе треба поголем временски период да бидат реконструирани и вратени во употреба.
Поплавени се посеани земјоделски површини, а голем број на домаќинства се соочуваат со поплавени куќи и помошни простории.
Локалната самоуправа предводена од градоначалникот Момчило Алексовски ги вложува сите напори за да се излезе во пресрет на граѓаните и да се санираат предизвиканите штети.
Општина Ранковце апелира до државните институции од кои побара соодветна помош навремено да реагираат и да помогнат во отстранувањето на штетите предизвикани од поројните дождови.“, пишува во соопштението од Општина Ранковце.