Почнува процесот на раздолжување на општината Охрид, чија сметка е блокирана веќе две децении. Советот на општината на денешната седница го усвоила извештајот за вкупниот договорен износ по доверители за финансирање на доспеани а неплатени обврски.
Вкупниот долг ќе биде намален за над 15 милиони евра, од кои 8 милиони евра ќе обезбеди Владата, дел ќе се обезбедат по основ отпис на камати, а останатите ќе се обезбедат од основниот буџет по основ на склучување спогодби со доверителите.
Со ова, вкупниот долг на општината ќе се намали на 8,6 милиони евра.
„Крајната цел е во наредните две година, по две децении, сметката на општината да биде одблокирана. Денеска е голем ден за општина Охрид и нејзините граѓани. По макотрпна и посветена работа, со помош на Владата, почнуваме со реализација на процесот на раздолжување на општината, нејзина финансиска консолидација и почеток на нов развоен циклус“, рече вршителот на должност градоначалник Константин Георгиески.