Гостиварската локална самоуправа најави дека до крајот неделата ќе се врши дезинсекција на повеќе локации и апелира до одгледувачите на пчели да преземат наврмеени активности за заштита на пчелните семејства.
– Во петок (4 август) ќе се изврши запрашување на подрачјето на општина Гостивар против комарци и други штетници. Дезинсекцијата ќе се врши навечер, од 21 до 1 часот, како и во раните утрински часови од 3 до 6 часот, доколку дозволат атмосферските прилики. Во случај на дождливо време или силен ветер, дезинсекцијата ќе се одложи за наредниот ден или некој друг ден со подобри атмосферски услови, се наведува во соопштението на службата за информирање од Општина Гостивар.
Со планот за динамиката на активностите, дезинсекцијата ќе се спроведе на четири локации, бреговите на Вардар по течението низ село Равен, делови околу каналот за наводнување во населбата Малеарди, населба Фазанерија по должината на каналот за наводнување и околу бреговите на реката Јахорка во село Форино.
Дезинсекцијата ќе ја врши овластено претпријатие ДПТУ ДРЕАМ-МС. За дезинсекција ќе се користи разреден Aqua-Kothrine (од 50 до 100 мл/ха) што е согласно со барањата на Светската здравствена организација.
