Општина Гевгелија во овој момент должи преку 125 милиони денари кон приватни фирми. На 25 октомври, денот кога ја презедов функцијата градоначалник долгот на општината изнесуваше четири милиони евра, а на нејзината сметка имаше само 550.000 денари, рече на прес-конференција градоначалникот Сашо Поцков, нагласувајќи дека финансиската состојба е сериозна и аларматна затоа што општина Гевгелија должи два годишни основни буџети.
– Очекуваме да пристигнуваат и нови фактури за задолжување на општината. По основ на кредитни задолжувања општината должи два милиони евра и уште 3,5 милиони денари кон спортски клубови, културни друштва и здруженија на граѓани на име одобрени средства за програмите од тековната година. За неисплатени обврски за минатата година деновиве падна и првата тужба, информира Поцков.