За изградба на новите 14 училници во СОУ „Јосиф Јосифовски“ во Гевгелија, проект кој претставува дел од развојниот план на општина Гевгелија за 2018 година, Советот одлучи општината да ги обезбеди дополнителните 3,7 милиони денари кои како неопходни произлегоа по завршеното истражување од Институтот за земјотресно инженерство и сеизмологија.
За реализација на овој проект претходно од страна на Светската банка на општината и беше одобрен кредит од 34,7 милиони денари. Откако општина Гевгелија ќе ги обезбеди средствата за сопствено учество веднаш ќе почнат и градежните работи кои ќе се изведуваат на два ката во западното крило од училишната зграда.
Со реализацијата на овој значаен проект во гевгелиската гимназија ќе се обезбедат услови за едносменско работење кое ќе овозможи значително намалување на сегашните трошоци за изведување на образовниот процес.