Општина Берово распишa оглас за финансиска поддршка на здруженија на граѓани и фондации од општинскиот буџет за 2018 година. Распределбата на средствата од буџетот на општина Берово за 2018 година наменети за финансирање на програмските активности на здруженија и фондации, ќе се врши согласно со добрите практики за финансиска поддршка на здруженија на граѓани и фондации и врз основа на одлука на општинскиот совет.
Градоначалникот Звонко Пекевски истакна дека средствата од буџетот на општина Берово во вкупен износ од 300.000,00 денари, ќе се користат за финансирање на програмските активности на здруженијата и фондациите, преку грантови за програми, односно проекти.
Средствата ќе се доделуваат согласно договорот на неколку дела за 2018 година. Рокот за реализација на проектот е осум месеци од денот на потпишувањето на договорот со општина Берово. Основни организациски критериуми кои треба да ги исполнуваат здруженијата и фондациите што учествуваат на огласот се да се регистрирани според Законот за здруженија на граѓани и фондации, да спроведуваат активности од минимум една година, да се занимаваат со активности и проекти од јавен интерес, да не добиле средства или поднеле пријава од друг орган на државната управа или други извори за иста намена и активности за кои поднесуваат пријава, а што би значело двојно финансирање на истите активности од различни извори, корисниците да дејствуваат на територијата на општина Берово. Предлог-проектите треба да кореспондираат со стратешките – развојни документи на општина Берово, да се од суштинско значење за подигнување на квалитетот на живеењето на граѓаните во локалната заедница во соодветните области, како и апликантите да прикажат сопствено учество или кофинансирање од други извори во износoт од најмалку 10 % од вкупниот износ на буџетот на самиот проект, истакна Пекевски.
Здруженијата и фондациите не можат да поднесат повеќе од една пријава за финансиска поддршка по огласот. Рокот за поднесување на пријавите е најдоцна до 16.04.2018 година.