Општина Аеродром ќе потпише меморандуми за соработка со две организации за родова еднаквост, со цел Аеродром да стане родово сензитивна општина.
„Соработката со организациите на жени ќе придонесе за долгорочно унапредување на родовата рамноправност во нашата општина и зајакнување на капацитетите на администрацијата, но пред сè за подигање на свеста за ова прашање“, изјави градоначалникот Марин.
Од општината информираат дека преку Меморандумот за соработка со агенцијата на Обединетите нации, Општина Аеродром ќе добие стручна помош и поддршка за воведување родово одговорно буџетирање, како еден од предусловите за членство во Европската Унија, како на национално, така и на локално ниво. Меморандумот за соработка со Националниот совет за родова рамноправност, пак, ќе значи рамка за воспоставување соработка со организација на полето на подигање на свеста за родова рамноправност со голем број членки, соопштија од Општината и додадоа дека Националниот совет за родова рамноправност понудил експертиза и помош за активностите на Комисијата за родова рамноправност на Општина Аеродром за аплицирање и пристап до фондовите на ЕУ.