Градоначалникот на Аеродром Ивица Коневски денеска најави изградба на две нови паркиралишта во општината со капацитет од околу 150 места.
На денешната прес-конференција покрај булеварот „АСНОМ“ во близина на трафостаницата на ЕВН, Коневски рече дека општина Аеродром ќе продолжи да се справува со недостигот од паркинг-простор за жителите од урбаниот дел.
– Новите паркиралишта кои се лоцирани лево и десно од трафостаницата на ЕВН „Кец Аеродром“, ќе се градат во непосредна близина на паркот „Аеродром“ и до фудбалското игралиште и ќе бидат целосно осветлени, истакна Коневски.
Директорот на Јавното претпријатие „Градски паркинг“, Борче Јакимовски информира дека паркирањето на двете паркиралишта ќе биде бесплатно.
Паркиралиштето што ќе се гради до фудбалското игралиште е со површина од 2.300 квадратни метри, со капацитет од околу 100 паркинг-места, од кои три ќе бидат наменети за лица со посебни потреби. Вториот паркинг што ќе се гради во близина на паркот „Аеродром“ е со површина од 1.400 квадратни метри и со капацитет од околу 50 места, од кои две се наменети за лица со посебни потреби.
Општина Аеродром до сега има изградено 17 нови паркиралишта со над 2.000 паркинг-места.