Опозицијата бара укинување на привилегијата, поранешен премиер да има 6 телохранители и возач, која власта ја изгласа во 2013-та година.
„Прецизирањето на тоа колку обезбедувачи ќе има, (вкупно шест и возило и возач) кои сам ќе ги одбере и тогаш и сега го оценуваме како израз на слабост и страв на човекот кој наводно ужива најголема доверба и углед меѓу граѓаните. Ваквото решение претставува луксузирање и самоволно поставување во повластена состојба на позицијата поранешен премиер во однос на сите други функционери кои извршувале јавни избрани и именувани функции.
Сметаме дека секој функционер вклучително и поранешен премиер кој совесно ја извршувал својата должност, работел согласно законите и Уставот на Република Македонија и во интерес на граѓаните не треба да стравува за својот интегритет по завршување на мандатот, бидејќи државата има доволно мерки и механизми да обезбеди ефикасна заштита“, стои во образложението за измени на Законот за Влада, предложен од опозицијата.
Со укинувањето на тој член од Законот, велат, ќе се спречи и дополнителното луксузирање на поранешен премиер и трошење на народни пари и по престанување на функцијата“, се вели во предлог законот.