„Не може спикерот Велјаноски да си ги толкува прописите како што му одговара и да си игра мајтап со Собранието“, реагира опозицијата на изјавата од Кабинетот на Велјаноски во која јасно им порача-нема надзорни расправи ако опозиција не дојде на координацијата која ја закажа за в понеделник.
Не може , велат, претседателот на Собранието, кој е прв меѓу еднаквите да се чуди зошто шест месеци не го искористиле инструментот надзорна расправа за да ја контролираат Владата.
Велјаноски се повикал на членот 24, став четири од Законот за Собрание. Таму стои дека спикерот, со потпретседателите и со координаторите на пратеничките групи прават годишна проекција за бројот на надзорните расправи, согласно средствата и условите на Собранието.
Го потсетуваат да го прочита членот 21 став 3, во кој стриктно стои-„ Доколку 15 пратеници во писмена форма побараат одржување на надзорна расправа, преку претседателот на Собранието до претседателот на работното тело, тогаш претседателот на работното тело е должен веднаш да свика нејзино одржување“.
Значи велат од опозицијата закажувањето или не, не е по кеиф на Велјаноски, и дека не треба да ги меша расправите кои треба да бидат политички испит на работењето на Владата, со координациите, на кои не доаѓаат, поради како што велат негаторскиот и потценувачки однос на собранискиот претседател.
“Ќе побараме расправа и одговори за тоа колку пари им должи Владата на фирмите, колку и како се трошат парите во проектот ‘Скопје 2014’, на кој начин се злоупотребува социјалната помош на најсиромашните граѓани во партиско-изборни цели, зошто граѓаните добиваат катастрофални здравствени услуги во презадолженото јавно здравство, како и за што се трошат народните пари во УБК, ќе побараме одговори какви мерки презело МВР во случајот Љубе Бошкоски”, изјави вчера Игор Ивановски.
Опозицијата веќе ја подготвува за овој месец, првата надзорна расправа на тема „ Злоупотреба на парите за субвенции“.