Џип со скопски регистерски ознаки ноќеска целосно изгорел во пожар подметнат од непознати лица позади трговскиот центар „Три бисери“. Во пожарот бил зафатен и „Опел“ со скопски регистерски таблици, соопшти денеска полицијата.
На три минути по полноќ во ЕИК Скопје било пријавено дека позади ТЦ „Три бисери“ непознати лица на непознат начин опожариле „Мерцедес-Џип“ со скопки регистарски ознаки, сопственост на Т.Ѓ. (46) од село Марино. Од пожарот било зафатено и комбе „Опел“ со скопски регистарски ознаки, сопственост на Г.Љ. од Скопје. Од пожарот, „Мерцедес – Џип“ бил целосно опожарен, додека на комбето бил зафатен само еден дел. Пожарот е изгаснат од Бригадата за противпожарна заштита. Полицијата најави увид во текот на денешниот ден.
Во денешниот билтен полицијата соопшти дека синоќа околу 21:48 часот во Скопје, на ул. „Методија Митевски“, било забележан опожарен автомобил „Рено Меган“ со скопски регистарски ознаки, сопственост на Н.К. (44) од Скопје.
Пожарот настанал кај моторот, а како причина полицијата наведува најверојатно неисправна електрична инсталација. Од настанатиот пожар нема повредени лица, а причинета е само материјална штета која дополнително ќе биде утврдена. Пожарот бил изгаснат од страна на екипа од Бригадата за противпожарна заштита Скопје. Се преземаат мерки за целосно расчистување на случајот.
