Околу 10 илјади евра штета претрпел И.Ф.(40) од Доброште, општина Теарце, по пожарот што денеска околу 11 часот избувнал во неговата плевна, информираше портпаролот на СВР Тетово, Марјан Јосифовски.
Според неговите информации, плевната имала и приземје и кат при што од пожарот целосно изгорела дрвената конструкција и покривот на плевната, како и 300 бали детелина, 180 бали слама, 10 кубни метри буково огревно дрво, една мелница за пченка и неколку алатки.
– Во гасењето на пожарот учествувале тетовските пожарникари и месните жители кои го локализирале и изгаснале пожарот со што спречиле негово натамошно ширење и загрозување на блиските објекти, рече Јосифовски.
На самото место увид извршила екипа на полицијата при што вкупната материјална штета се проценува на околу 600 илјади денари. Се уште се работи на откривање на точните причини и сите детали околу овој пожар.
Напомнувајќи дека во изминатите два месеца во полошкиот регион биле забележани неколку пожари во плевни, Јосифовски апелираше до сопствениците на ваквите објекти да посветат особено внимание на електричната инсталација и да не користат електрични апарати или да влегуваат со запалки и опушоци во плевните доколку во нив имаат сточна храна, пченка или слама.