Одлуката за давање петгодишен закуп на паркинг-просторот на улиците од централното градско подрачје на Охрид е во насока на средување на сообраќајот во центарот на градот, соопшти Кабинетот на градоначалникот на Охрид како одговор на претходно изнесените обвинувања од страна на Општинскиот комитет на ВМРО-ДПМНЕ.
„Секој туристички центар во светот, за свое добро, за доброто на туризмот и развојот, треба да е среден. Сите улици, особено во централното градско подрачје мора да бидат средени и проодни, како за автмобили така и за пешаци. Тротоарите и просторите каде е забрането паркирањето мора да бидат проодни. А оние улици во централното градско подрачје, каде има доволно простор за проодност и за паркирање, како во сите туристички центри, така и во Охрид ќе се наплаќа со цел средување на сообраќајот во центарот, стои во реакцијата на општинската администрација, предводена од градоначалникот Александар Петрески.
Општина Охрид распиша тендер за давање петгодишен закуп на градежно изградено земјиште, паркинзи од втора и трета паркинг зона, а со стекнувањето право на стопанисување со паркинг-просторот, идните концесионери ќе вршат наплата за паркирање на повеќе улици од централното градско подрачје.
На таквата одлука реагираа од општинскиот комитет на ВМРО-ДПМНЕ, со обвинување дека градоначалникот Александар Петревски го претвора речиси целиот град во паркинг-зона со која ќе стопанисуваат неговите бизнис-партнери.
Од опозициската партија во Советот на општина Охрид ценат дека со таквиот чин на објавување на тендер пред престојните локални избори претставува расчистување на должничките односи на градоначалникот со неговите бизнис-пријатели.