Заменик-претседателот на Владата задолжен за европски прашања Арбр Адеми денеска, за време на неформалниот состанок на министри и државни секретари за европски прашања во Валета, Малта, оствари одвоени билатерални средби со министерот за надворешни работи и европски прашања на Република Хрватска Давор Иво Штир и со заменик-министерот за европски прашања во Министерството за надворешни работи на Естонија Мати Масикас.
Како што соопшти Кабинетот на Адеми, за време на средбите вицепремиерот се осврна на политичката состојба во земјата по спроведувањето на предвремените парламентарни избори, при што посочи дека во тек се преговорите за формирање нова влада.
– Членството во ЕУ останува клучен стратешки приоритет на земјата и затоа новата влада ќе има обврска целосно да го имплементира Политичкиот договор и да се посвети на имплементација на реформите во областите опфатени со Итните реформски приоритети, особено во делот на владеење на правото, судството и борбата против корупција, следењето на комуникациите, реформата на јавната администрација и медиумите, рече Адеми.
Ќе треба, додаде, да се работи и на целосна имплементација на Охридскиот рамковен договор како темел за натамошно унапредување на меѓуетничките и на добрососедските односи, како и за решавање на отворените билатерални прашања.
На средбата со министерот Штир беше истакната континуираната и принципиелната поддршка на Хрватска за Македонија и беше нагласена добрата соработка меѓу двете земји посебно во делот на евроинтеграциите. – Големиот број реализирани заеднички активности за размена на искуства се особено важни за нашата администрација во делот на координацијата на процесот на евроинтеграција и усогласувањето на националното законодавство со правото на ЕУ, истакна Адеми. На средбата беа допрени и регионални теми од заеднички интерес.
На средбата со заменик министерот Масикас, беше посочено дека е особено важно да се воспостави поблиска соработка и да се обезбеди поголема поддршка во телата на ЕУ за почнување на преговорите за членство, имајќи предвид дека Естонија ќе го преземе претседателството со ЕУ во втората половина на 2017 година.
За време на средбите, соговорниците се согласија дека и покрај предизвиците со кои се соочува ЕУ, политиката на проширување мора да остане високо на агендата на ЕУ, при што Адеми истакна дека е особено важно да продолжи поддршката од двете земји за пристапувањето на Македонија и другите држави од регионот во овој процес.