Советот на општина Тетово денеска ја одржа првата конститутивна седница по последните локални избори. На предлог на советничката група на ДУИ, не беше изгласан претседавачот на Советот поради, како што информираа, потребата од дополнителни консултации.
Седницата ја водеше највозрасната советничка Сребра Коцевска, а се обрати и новата градоначалничка Теута Арифи.
– Ви посакувам успешна работа и се надевам дека сите ќе работиме за доброто на граѓаните. Очекувам дека ќе надвладее толеранцијата и разбирањето, одговорноста и меѓусебната отвореност бидејќи Советот го сметам како локален парламент што ќе работи во интерес на граѓаните, рече Арифи.
Во новиот Совет на општина Тетово од вкупно 31 советник, ДУИ има 12, ДПА 10, коалицијата предводена од ВМРО-ДПМНЕ пет, СДСМ со коалицијата двајца и по еден советник имаат НДП и ДПТ.